Wednesday, February 13, 2013

အတွေးတစ်စ

ရန်ကုန်မြို့ကြီးက တစ်ခေါက်ရောက်တိုင်း တစ်ခါပြောင်းလဲနေသည်။ မိုးမျှော် တိုက်ကြီးများကလည်း အစီအရီ၊ လမ်းမကြီးများကလည်းကျယ်ပြန့်ညီညာလာပါ၏။ တိုးတက်မှု ခမ်းနားမှုတွေကို တွေ့ရ၏၊ ဒါပေမယ့် ခမ်းနားမှုကို ရုပ်ဖျက်နေတဲ့ အရာတွေကို စိတ်မကောင်းစွာတွေ့နေရသည်။ လမ်းဘေးဝဲယာမှာ အမှိုက်တွေကို တွေ့နေရသည်။ အမှိုက်ပုံးတွေလည်းရှိပါ၏။ တချို့နေရာတွေမှာ အမှိုက်ပုံး
တခြား အမှိုက်တခြားပဲ။ ဒီအမှိုက်တွေက မြို့ကြီးကို လှောင်ရယ်နေသလိုပင်။ အမှတ်တမဲ့ မသိမသာ ပစ်ခဲ့တဲ့အမှိုက်တွေက လမ်းဘးဝဲယာမှာသိသိသာသာ ပြန့်ကျဲနေ၏။ ကျွန်တော်အတွေးတစ်ခုဝင်မိသည်။ ဆိုပါတော့ မြို့တစ်မြို့မှာ လူတစ်သိန်းရှိသည်။ ထိုလူတစ်သိန်းကယောက်စီက တစ်နေ့ကို အမှိုက်တစ်ခုစီပစ်မည်ဆိုလျှင် တစ်ရက်ကို အမှိုက်တစ်သိန်းထွက်မည်။ ဆယ်ရက်ဆိုရင် ဆယ်သိန်းဖြစ်နေပါပြီ။ထိုအမှိုက်တွေကို စနစ်တကျ ပစ်ခဲ့လျှင် အကြောင်းမဟုတ်၊ အလွယ်တကူပစ်ခဲ့လျှင်တော့ လမ်းဘေးမှာ အမှိုက်တွေ များကုန်ပြီပေါ့။
တစ်ယောက်ချင်းစီက ကိုယ့်အမှိုက်ကို အမှိုက်ပုံးထဲ ထည့်လိုက်လျှင် ဘာမျှ အပန်းကြီးမည်မဟုတ်၊ ကျွန်တော်လည်း ကားပေါ်ကလိုက်ကြည့်ရင်းတွေးမိတွေးရာတွေ တွေးနေမိသည်။ ဒီအမှိုက်တွေက ကျွန်တော်တို့နိုင်ငံရဲ့ ဂုဏ်သိက္ခာကို လက်ညှိုးထိုးနေသည်ဟု ခံစားရသည်။
ကျွန်တော်တို့ကို လှောင်ပြောင်နေသည်။ ကျွန်တော်ကြံကြံဖန်ဖန်တွေးမိနေသလားတော့ မပြောတတ်၊ နိုင်ငံတစ်ခုရဲ့ ဂုဏ်သိက္ခာဆိုတာနိုင်ငံသားတစ်ယောက်ချင်းစီရဲ့ လက်တွင်းမှာ ရှိသည်မဟုတ်လား၊ နိုင်ငံသွားတွေက သူတို့နိုင်ငံရဲ့ ဂုဏ်သိက္ခာကို မြှင့်တင်နိုင်သည်။ သို့မဟုတ်
နှိမ့်ချနိုင်သည်။ တွေးနေတုန်းမှာပဲ ယာဉ်အကူက ရေသန့်ဘူးခွံတစ်ခုကို လမ်းပေါ်ကို ကန်ချလိုက်တာ တွေ့လိုက်ရသည်။

No comments:

Post a Comment

There was an error in this gadget